ads
ads

“إعتذار ” للشاعرة سميرة غانم

الثلاثاء 12-03-2019 21:09

إعتذار …

للشاعرة/ سميرة غانم

عن جد بدّي اعتذر

ما قدِرْت كون السفينة

وانتَ الموج وانتَ البحر

او غفّي بي ليلي الظنون

وسكّت قلام الحبر

ولا قدرت لاقي بالسما غيمة

وأرسم مروج وبيت

يرشو الدفا بالعطر

ما قنِعْت باليمكن وبال يا ريت

يكونو لسنيني مهر

ما قدرت أفتح باب

أركض لعندك منو بي كلمة أمر

محتار فكري..والقرار ضفه ونهر

والدرب مفرق صار

بدك وبدي نبدا من أول سطر

وعمنكتب القصة بإيد

مرة بترجف ومرات بِ شِلّا الصبر

يمكن قرار البُعد صرلو دهر

والدرب عم يخلق درب

وبعد الوعر في وعر

عنجد بدي أعتذر

ما قبلت يخلص هالعمر

ويصير أبيض هالشعر

وكفّي حياتي بالقهر

عنجد صعبة مجرّب يخونو الفكر

والحيرة تحكم كلمتو

والخجل يحسملو الأمر

عنجد بدي اعتذر

ما قدرت إلبسلك من وعودك عقد

ما قدرت إزرعلك على عتابي ورد

وبعتذر لو ما شفت بسطوري عذر

اضف تعليق